مـا نسيتـك ثوانـي

يمكن تحس اني مع البعـد ناسيـك
لكن تأكـد .. مـا نسيتـك ثوانـي


لا مر طيفك قمت اهوجس واحاكيـك
واشكي لى طيفك كثر ماهو شكانـي


واتذكـر اشيائـك .. واردد اغانيـك
وابكي اذا حسيـت حظـي رمانـي


واحمّل النسمـات طيـف ٍ يناجيـك
واطلق مع ذكرااااك صهـوة عنانـي


واحسّ تتسأل عـن احـوال مغليـك
واجاوبك ..تذكر مكانـي! مكانـي!!


وتقول: لي وشفيك؟ واقول: وشفيك !
وشلون ما تبغـى بعدهـا اعااانـي!


وتقول: لي طيفـي تركتـه يداريـك
واقـول: طيفـك للمهالـك حدانـي


وتقول: لي تبكي! وانا اللي موصيك
واقول: لك تبغـى ازف ّ التهانـي!!


صرت اتجرع مرّ مـن دون حاليـك
واكتب على الفرقا قصيـد واغانـي


لا جيت ابكتب مـدح لازم اطريـك!
ولا جيت ابكتب حب مالحـب هانـي


صرت اكتب الفرقا بفحـوة معانيـك
واطلع مع فرقاي بأصـدق معانـي!


واسامر النجمة وانا اقـول : لبيـك
اسمع وحيـك.. ولا اكـذب اذانـي


وانته بعيد ٍ مـا وصلنـا اراضيـك
الا انك اقرب من صفـوف المحانـي


ولاجابو اسمك جيت كنـي معاديـك!
عشان مسمع قول خلّـي نسانـي !


والا انت وافي والوفـا مـا يخليـك
والطيب بصلك ما خفـاك وخفانـي


لذا .. تصبّر والصبر فـي معاليـك
يهون .. يوم ٍ قلت : تكفى عشاني!